କରୋନା ପାଇଁ ଟଙ୍କା ଦରକାର କହି ଷ୍ଟାଚ୍ୟୁ ଅଫ୍ ୟୁନିଟିକୁ ୩୦ କୋଟିରେ ବିକ୍ରି ପାଇଁ ବିଜ୍ଞାପନ ଦେଲା ଠକ, ଆଉ ତାପରେ..

ଯେତେବେଳେ ଦେଶ କରୋନା ଭାଇରସ ମହାମାରୀ ସହ ଲଢେଇ କରୁଛି, ସେତେବେଳେ ବିଶ୍ୱର ସର୍ବୋଚ୍ଚ ପ୍ରତିମୂର୍ତ୍ତି ଷ୍ଟାଚ୍ୟୁ ଅଫ୍ ୟୁନିଟି ବିକ୍ରୟ ପାଇଁ ଅନଲାଇନ୍ ୱେବସାଇଟରେ ଏକ ବିଜ୍ଞାପନ ପ୍ରକାଶ ପାଇଛି। ଦେଶରେ କରୋନା ଭାଇରସ ସଙ୍କଟ କ୍ରମାଗତ ଭାବେ ବୃଦ୍ଧି ପାଉଛି। ଏଥି ସହିତ ଦେଶରେ କରୋନା ବିପଦର ମୁକାବିଲା ପାଇଁ ୨୧ ଦିନିଆ ଲକଡାଉନ ଚାଲିଛି। ଇତି ମଧ୍ୟରେ, ଗୁଜୁରାଟରେ ଷ୍ଟାଚ୍ୟୁ ଅଫ୍ ୟୁନିଟି ବିକ୍ରୟ ସହ ଜଡିତ ଏକ ଅନଲାଇନ୍ ବିଜ୍ଞାପନ ସାମନାକୁ ଆସିଛି।

ଅନଲାଇନ୍ ୱେବସାଇଟ୍ OLX ରେ ବିଶ୍ୱର ସର୍ବୋଚ୍ଚ ପ୍ରତିମୂର୍ତ୍ତି ଷ୍ଟାଚ୍ୟୁ ଅଫ୍ ୟୁନିଟି ବିକ୍ରୟ ପାଇଁ ଏକ ବିଜ୍ଞାପନ ଦିଆଯାଇଛି। ଷ୍ଟାଚ୍ୟୁ ଅଫ୍ ୟୁନିଟିର ବିକ୍ରୟ ବିଜ୍ଞାପନ ଯୋଗୁଁ ସରକାରୀ ବିଭାଗରେ ମଧ୍ୟ ଆଲୋଡ଼ନ ସୃଷ୍ଟି ହୋଇଛି। ବାସ୍ତବରେ, OLX ରେ ଏକ ବିଜ୍ଞାପନ ପୋଷ୍ଟ କରାଯାଇଥିଲା ଯେଉଁଥିରେ ଷ୍ଟାଚ୍ୟୁ ଅଫ୍ ୟୁନିଟିର ବିକ୍ରି ପାଇଁ କୁହାଯାଇଛି। ଏହି ବିଜ୍ଞାପନରେ ଷ୍ଟାଚ୍ୟୁ ଅଫ୍ ୟୁନିଟି 30 ହଜାର କୋଟିରେ ବିକ୍ରି ପାଇଁ ରଖାଯାଇଛି। ଏହାସହ ଲେଖା ଯାଇଛି ଯେ ଗୁଜୁରାଟ ସରକାର କରୋନା ଭାଇରସ ମୁକାବିଲା ପାଇଁ ଡାକ୍ତରଖାନା ଏବଂ ଚିକିତ୍ସା ଉପକରଣ ପାଇଁ ଟଙ୍କା ଆବଶ୍ୟକ କରୁଛନ୍ତି।

ଏଥି ସହିତ, ମାମଲା ଆସିବା ପରେ ଷ୍ଟାଚ୍ୟୁ ଅଫ୍ ୟୁନିଟି ପ୍ରଶାସନ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରି କେଭାଡିଆ କଲୋନୀ ପୋଲିସ ଷ୍ଟେସନରେ ଏହି ମାମଲା ଦାୟର କରିଥିଲା। ଅଜ୍ଞାତ ବ୍ୟକ୍ତି ଏବଂ OLX କମ୍ପାନୀ ବିରୋଧରେ ପ୍ରଶାସନ ଏକ ମାମଲା ରୁଜୁ କରିଛି। ଏହି ପ୍ରସଙ୍ଗରେ ଡେପୁଟି କଲେକ୍ଟର ନୀଲେଶ ଦୁବେ କହିଛନ୍ତି ଯେ OLX କମ୍ପାନୀ ସହ କଥା ହୋଇ ଏହି ବିଜ୍ଞାପନକୁ ହଟାଇ ଦିଆଯାଇଛି। ତେବେ ୱେବସାଇଟରେ କିଏ ଏପରି ବିଜ୍ଞାପନ ଦେଇଛି ତାହା ଅନୁସନ୍ଧାନ କରାଯାଉଛି।